Agjenci imobiliare në Kosovë, Shqipëri dhe Maqedoni

Si të shfaqesh si agjenci në Shpizo

Katër hapa, pa ndërmjetës dhe pa pritje për aprovim të profilit:

1. Krijo llogari me email-in e agjencisë.
2. Plotëso të dhënat — emrin, qytetin ku vepron, logon, telefonin dhe faqen e internetit.
3. Publiko shpalljen e parë.
4. Profili publik krijohet vetvetiu, me një adresë të përhershme që nuk ndryshon.

Profili nuk pret aprovim. Çdo shpallje veç e veç kalon nëpër moderim para se të dalë publike — kjo është ajo që e mban listën të pastër, dhe vlen njësoj për agjencitë dhe për pronarët privatë.

Sa kushton

Nëse drejton një agjenci imobiliare në Kosovë, Shqipëri ose Maqedoni të Veriut, mund ta listosh atë këtu dhe të publikosh prona pa kufizim numri. Regjistrimi është falas gjatë fazës së nisjes. Verifikimi kërkon numër biznesi, telefon të vlefshëm dhe faqe interneti.

Më vonë do të ketë plan me pagesë. E themi tani, që ta dish para se të investosh kohë duke ngarkuar prona.

Nuk ka kufi në numrin e shpalljeve. Një agjenci me pesë prona dhe një me pesëdhjetë kanë të njëjtat kushte.

Çfarë përfiton profili i agjencisë

Faqe publike me adresë të përhershme, ku të gjitha shpalljet tuaja qëndrojnë bashkë. Kontakt direkt me kërkuesin — telefoni dhe të dhënat e agjencisë shfaqen te çdo shpallje, pa u filtruar nëpër formularë. Shpalljet hyjnë në kërkimin e Shpizos dhe në faqet e qyteteve përkatëse, jo vetëm në profilin tënd. Dhe badge-i "E verifikuar", pasi të kalosh verifikimin.

Çfarë do të thotë "E verifikuar"

Badge-i shfaqet te agjencitë të cilave ekipi i Shpizos u ka konfirmuar identitetin. Verifikimi kërkon tri gjëra: numrin e biznesit, një telefon të vlefshëm dhe faqen e internetit të agjencisë.

Çfarë nuk është: verifikimi konfirmon se agjencia ekziston dhe se kontakti është real. Ai nuk garanton çmimin, gjendjen e pronës, as kushtet e kontratës.

Prandaj, edhe te një agjenci e verifikuar: vizito pronën para se të paguash çfarëdo shume, mos dërgo paradhënie pa kontratë me shkrim, dhe kërko dokumentet e pronësisë para se të firmosësh.

Si të zgjedhësh një agjenci imobiliare

Pesë gjëra që i pyet para se t'i besosh dikujt kohën dhe paratë:

• Numri i biznesit. Një agjenci serioze e jep pa hezitim. Nëse shmanget, mjafton si përgjigje.
• Komisioni, para se të shohësh pronën. Sa është, dhe kush e paguan — qiramarrësi, pronari, apo të dy. Kjo shifër ndryshon shumë mes agjencive dhe rrallë përmendet vetë.
• Kontratë me shkrim. Për vetë qiranë, dhe për marrëdhënien me agjencinë nëse ka tarifë.
• Adresë fizike. Një zyrë ku mund të shkosh është ndryshim i madh nga një numër telefoni.
• Kërkesa për para para vizitës. Askush nuk duhet të kërkojë paradhënie, "tarifë rezervimi" ose "tarifë shikimi" para se ta kesh parë pronën me sytë e tu. Kjo është shenja më e zakonshme e mashtrimit në këtë treg.

Pyetje të shpeshta

A kushton gjë të publikoj si agjenci?

Jo gjatë fazës së nisjes. Profili, shpalljet dhe verifikimi janë falas, dhe Shpizo nuk merr komision. Më vonë do të ketë plan me pagesë.

A mund t'i ngarkoj shpalljet me shumicë?

Jo ende. Për momentin shpalljet publikohen një nga një. Importi me shumicë është në plan, por nuk ekziston sot — nëse ke dhjetëra prona, kjo do të thotë punë manuale në fillim.

Sa shpallje mund të publikoj?

Sa të duash. Nuk ka kufi.

Sa zgjat verifikimi?

Pasi dërgon numrin e biznesit, telefonin dhe faqen e internetit, ekipi i kontrollon dhe e aktivizon badge-in. Profili dhe shpalljet funksionojnë normalisht edhe pa verifikim — badge-i shton besueshmëri, nuk hap akses.

A merr Shpizo komision nga qiraja ose shitja?

Jo. Pagesa bëhet drejtpërdrejt mes palëve.